General Santos City–Gimaymayan ni Barangay Fatima Kapitan Rey Curit ang mga estudyanteng nagtungha sa mga eskwelahan sa iyang Barangay nga likayan ang pag apil-apil sa mga grupo sa mga batan-ong gapasiugda ug bingkil sa ilang isig ka mga batan-on.
Kini nag maymay sa kapitan human natigayon ang pagpanunggab sa biktimang itago lang sa pangalang Alias Renren, 16 anyos, estudyante sa Fatima National High school nga taga Purok Alquisar, Barangay Apopong, Gensan, kansa gidunggab sa sikad driver niadtong nakalabayng adlaw.
Kahinumduman nga nakadawat nalang ug report si kapitan Rey Curit, nga matud pa dunay gidunggab nga estudyante gawas sa maong tunghaan maong iyang giparespondihan sa iyang mga tanod.
Dako ang pagtuo ni kapitan Curit nga aduna nay daang bingkil ang biktima ug ang suspek ayha paman nahitabo ang pagpanunggab.
Niadtong nakalabayng adlaw dihang nanggawas na ang mga estudyante sa maong tunghaan didto na giatngan sa suspek ang nasampit nga biktima.Gidunggab sa suspek si Alias Renren kansa gilayon man usab nga gidala sa ospital, samtang ang suspek paspas nga misibat sa wala masayring lugar.
Dugang pa ni kapitan curit nga inay mag apil-apil sa mga grupo sa mga batan-on mas maayong mag focus nalang sa ilang pagtuon aron sa ingon sa pag-abot sa panahon makatabang pa sila sa ilang pamilya.
