General Santos City–Aminado karon ang kapitan sa Brgy.Dadiangas South nga si Rock Garay nga naapektuhan pod kini sa nahitabo sa mga vendors nga anaa nahimutang sa may Casquejo,Cagampang ingon man sa palibot sa palengke human nga gipapahawa gumikan sa kamanduan ni Pangulong Rodrigo Duterte.
Sumala pa ni Garay nga bisan sakit sa iyang kasing-kasing ang nahitabo sa mga vendors ingon man sa mga tricycle drivers apan wala siyay mahimo kon dili ang pagtuman sa kamanduan sa pangulo nga hinloon ang mga public roads tungod kay balaod man ug kinahanglan gayud nga sundon.
Saysay usab sa kapitan nga dili lang mabalaka ang mga vendors gumikan kay naghimo na siya ug lakang pinaagi sa pagduso ug proposal sa konseho nga mahatagan ug night market ang mga vendors atubangan sa may queen tuna park.
Dugang pagbutyag ni Kapitan Rock Garay nga bisan pa man nga naghimo na sila ug mga plano aron lamang mamahimong hapsay ang pag-agi sa mga tawo ingon man sa mga sakyanan sa kadalanan duna pa gihapoy mga badlongon nga mga drivers nga pataka lang ug park sa ilang mga sakayanan sa karsada.
Gani nanawagan ang maong kapitan sa Traffic Management Unit (TMU) nga hatagan nila ug pagtagad ang mga sakyanan nga wala sa lugar nga mopark nga kini mapahawa gayud sa area.
Pagpaklaro man usab ni Garay nga dapat gayud mabutangan ug mga deputized enforcers ang lugar aron duna silay katungod gayud nga manakop sa mga pasaway nga mga drivers.
Pagpaklaro ni kapitan Rock Garay nga gumikan sa kamanduan ni Pangulong Duterte nga limpyohon ang mga public roads iyang nakita nga wala na nakamugna ug trapiko ug hapsay na ang dagan sa mga kadalanan.
Apan kung mamahimong ningas kugon pa gihapon ang gobyerno sa pagpatuman sa balaod mahimong mubalik pa gihapon ang problema sa kadalanan.
Samtang awhag na lamang sa kapitan nga kinahanglan nga magtinabangay ang matag usa ug mokooperar sa mga lakang sa gobyerno gumikan kay alang kini sa kaayuhan sa tanan. (Reynald Timario)
