Kapitan sa Samal gipusil-patay

501

Davao City – Gideklarang dead on arrival ang usa ka kapitan lakip ang bodyguard niini human gipamusil sulod sa iyang panimalay sa alas-7:30 kagabii, Nobyembre 25, Prk. Avocado, Brgy. Sion, Kaputian District, Island Garden City of Samal.

Patay nang naabot sa Southern Philippines Medical Center (SPMC) alas-9:24 sa gabii si Paulito ‘Jun’ Viillaceran, kapitan sa maong barangay, ug ang bodyguard niini nga si Johnny Caro.

Sa inisyal nga imbestigasyon sa Kaputian PNP, anaa sa lobby si kapitan niadtong tungora kuyog iyang asawa nga si Maribeth Villaceran samtang anaa sab sa gawas ang kakaubanan niini nga sila si Randy Inday, Mario Cagasan, Josephine Commendador, ug Johnny Caro diin kalit gisulod sila sa tulo ka mga wala mailhing armadong lalaki kinsa nakasuot og shorts ang duha samtang naka pantalon ang usa ug pulos naka t-shirt, dayon gipusil ang mga naasoy.

Igo sa tiil si Randy ug si Mario samtang sa paa naigo si Josephine ug ang asawa sa kapitan kinsa padayong nagapaalim sa SPMC, samtang naigo sa tiyan ug likod nga bahin ang body gurd niini nga si Caro ug igo sa tiyan ug ulo nga bahin ang maong kapitan.

Gisulayan pa og dala sa SPMC ang kaitan ug ang bodyguard niini apan way swerteng nakabsan kini og kinabuhi.

Narekober sa crime scene ang 12 ka mga empty shells sa .45 nga pistola lakip ang tulo ka mga fired bullets.

Sa pagka karon, blanko pa ang kapulisan sa nagpaluyo niini ingon man sa motibo sa maong insidente gani nagapadayon ang ilang imbestigasyon.

RadyoMaN Jason Amisola

Facebook Comments