Davao City – Gipaniguro sa kapolisan nga dili mahitabo ang giingong extrajudicial killings (EJK) niining subling pagbalik sa kapolisan sa kampanya batok gidiling droga gikan sa Philippine Drug Enforcement Agency (PDEA).
Sa interview sa DXDC RMN Davao gibutyag sa tigpamaba sa Davao City Police Office (DCPO) Senior Inspector Maria Teresita Plaza Gaspan, wala sa ilang tahas ang giingong EJK diha sa pagsumpo sa gidiling droga.
Matud ni Gaspan, dili na lisud alang kanila tungod kay gisangon na kini kanila kaniadto apan subling gibalik kanila tungod kay kulang ang mga personahe sa PDEA nga mopatuman niini.
Gipasalig usab ni Gaspan nga mas palig-unon pa nila ang ilang kampanya kontra droga human gibalik kanila ang tahas apan mag-agad usab sila kung unsay mga mando sa pangulo alang niini.
Una niini gisulti sa kanhi police ug karon barangay kapitan sa Barangay 76-A Bucana Rolando Trajera, wala sa mandatus sa kapolisan nga mopatay og tawo sa bisan unsang kampanya nga wala mipakita sa pagsukol sa mga awtoridad. Matud ni Trajera, dili kalikayan nga dunay mamatay tungod kay misukol ang suspect o police tungod kay naunhan sa mga suspetsado.
RayoMaN Bernard Pantallon
