Gibutyag ni Police Major Catherine Dela Rey, DCPO spokesperson, seguraduhon una nga madakpan ang subject sa operasyon ug kung nag-atubang na og peligro kay nagpabuto na ang target diha pa kini mogamit ang kapolisan sa ilang pusil.
Segun ni Dela Rey, aron mawala usab ang duda sa katawhan ug magsilbing ilang proteksyon, kinahanglan aduna gayuy body worn cameras ang mga pulis atol sa ilang operasyon.
Gibutyag ni Dela Rey, sa higayong adunay mamatay nga subject sa operasyon, awtomatik nga ang Internal Affairs Service (IAS) molusad og moto propio investigation kung insakto ba ang gihimo sa kapolisan.
Sa higayong makita sa inbestigasyon nga adunay sayop ang police officers mag-atubang kini’g kaso lakip na ang mga station commanders.
“Wala ta gapabaya especially kung mga operations nga anaay mamatay mu-conduct dayon ta’g investigation kay dili ta gusto nga adunay maagrabyado sa atoang mga ginapangbuhat as police officers sa atong pagserbisyo sa katawhan,” matud ni Dela Rey.
RadyoMaN Aimee Guinita
