General Santos City–Aduna nay person of interest ang Police Station 3 sa nahitabong pag panungab sa wala mailhing suspect sa usa ka dalaga nga nitago lang sa pangalang alyas whitney, 22 anyos, sulod mismo sa iyahang giabangan nga boarding house sa Casa Luisa, Barangay Lagao, kaadlawon niadtong martes.
Sumala pa ni Police Lt. Felix Minion III ang Deputy Chief Of Police sa Police Station 3 nga sa karon padayon sila nga nagapangalap ug ebidensya alang sa pagtumbok sa suspect ug mapasakaan ug tukmang kaso.
Nasayran nga samtang natulog ang biktima alas 2:45 ang takna sa kaadlawon gisulod sa kawatan ang iyahang kwarto pinaagi sa pagguba sa screen sa iyahang bintana kung asa nakuha sa suspect ang cellphone niini nga nag kantidad ug 9 mil ka pesos.
Dugang pa ni Police Lt. Minion nga sa dihang namatikdan sa biktima ang suspect gilayon kini nga gituok ug dungan tabon sa baba sa biktima ug sa dihang nag kisi-kisi na ang nasangpit gidungab kini sa suspect gamit ang hait nga hinagiban sa iyahang kamot ug tuhod dayong dagan palayo sa lugar.
Sa kasamtangan anaa naman usab sa luwas nga kanhimtang ang biktima human nga natambalan kini sa Dr. Jorge Royeca Hospital.(Dave Silagan)
