Davao City – Dili takos suportahan sa katawhan ang pagbalik sa kampanya kontra droga ngadto sa Philippine National Police (PNP) gikan sa kamot sa Philippine Drug Enforcement Agency (PDEA).
Gisulti ni Sentro Labor Organization convenor Michael Ybanez nga mas ikodena pa gani ang kapulisan tungod sa pagpatay sa tulo ka drug suspects didto sa Tondo, Manila, di pa lang dugay.
Giingon ni Ybanez nga nakahilak kini dihang iyang nakita sa social media ang video kung giunsa pagpatay sa mga pulis ang tulo ka drug suspek didto sa Tondo.
Nagtoo si Ybanez nga dili makadawdaw og suporta gikan sa publiko ang plano ni Pres. Rodrigo Duterte nga ibalik sa PNP ang ‘war on drugs’ gumikan sa nahitabo sa Tondo, Manila.
Kung kaniadto makabungog ang suporta sa publiko apan karon daw sama sa kalawom sa pasipiko ang pagkawani sa pag-uyon sa katawhan sa kampanya kontra droga nunot sa extrajudicial killings (EJK).
Gisabunan og saway sa convenor ang gobyerno karon tungod kay ang naligsan lang daw sa ‘war on drugs’ ang mga kabos apan kun arangan og kahimtang wala ginalutos sa mga otoridad.
Kampante si Ybanez nga gahi pa sa bato ang kasingkasing sa kadaghan aron paluyohan ang tinguha ni Pangulong Duterte nga ibalik sa kapulisan ang ‘war on drugs’.
Gibarugan ni Sentro Labor Organization Convenor Michael Ybanez nga biktima lang ang mga kabos nga nalambigit sa droga busa dili sila takos nga patyon sa kapulisan sa matag anti-drug operation.
Nabalaka kini nga basin makuyanap na pod ang giingong EJK kun pangunayan na pod sa PNP ang ‘war on drugs’ ni Pangulong Rodrigo Duterte.
RadyoMaN Joel Viray
