Pagadian City – Gumikan sa pagsaka sa ihap nga nabiktima sa mga mangingilad ug mangunguot sa syudad sa pagadian naagda ang kapulisan ning dakbayan sa pagpagawas og sulat pahimangno arun masumpo nagpasi-ugda sa krimen.
Ang kapulisan nga gipanguluhan ni Psupt. Benito Recopuerto nag-awhag sa katawhan nga magbinantayon ug magma-igmat sa kanunay batok sa mga Budol-budol gang, Dugo-dugo gang, mangungu-ot ug uban pang matang sa pangilad.
Lakip nga gipalikayan sa kapulisan ang pagpalit sa mga numero nga gibaligya alang sa dula nga swertres.
Gipa-amping usab ang mga mamalitay batok sa mga suspek nga disente kung tan-awon apan mangungu-ot diay.
Gipahibalo usab sa kapulisan nga dunay mga nabiktima nga gilaslasan ang bag niini.
Daling makigkutay sa ilang buhatan kun makasugat o makamatikud sa maong mga tawo ang awhag sa kapulisan sa katawhan ning syudad.
