Mag-amay ginpamumusil patay ha Samar, asawa hini kritikal an kondisyon

TACLOBAN CITY – Gin atake han mga diri pa nakikilala nga mga suspek an usa nga panimalay dapit ha remote mountain barangay ha Brgy. Gigaasan, Calbayog City ha Samar dida han lunes, Oktubre 23, 2017 kun diin patay an parag-uma ngan an iya anak nga babaye ngan kritikal naman an kondisyon han asawa hini.

Sumala han Calbayog City Police Station, ginkilala an namatay nga hira Jojo Dulay, 42 anyos ngan an iya 3 anyos nga anak nga babaye nga gintutuuhan ginlubong han mga suspek ha iba nga lokasyon.

Ha pagkadto han mga rumesponde nga pulisya, nakit-an an patay nga lawas ni Jojo Dulay nga aada na ha state of decomposition samtang an iya asawa nga hi Analie in natad-an han mga imbistigador ha hospital han Northern Samar nga kritikal an kondisyon tungod han naangkon hini nga igo hin bala hin pusil ha iba nga parte han iya lawas.


Nakakarawat naman hin inisyal nga impormasyon an Calbayog PNP nga lima nga Brgy. Officials an gin aaligar nagpapaluyo hini nga krimen, base han statement han mga eyewitness ngan mga ebidensya nga nakuha han investigating team han insidente.

Gin aresto na han mga otoridad hira Brgy. Chairwoman Leny Roño, treasurer Aries Cajusay, Councilman Jesus Roño, Brgy. Tanod Herman Sumagdon ngan an anak han Chief Tanod nga hi Ely Saluyan.

Napasakahan na hin kaso nga murder, frustrated murder ngan illegal possession of firearms an mga suspek.

Ginklaro naman han pulisya an motibo hini nga krimen nga posible away hiton tuna an gintikangan hini.

Naglalaum naman an mga otoridad nga mabuhi hi Analie para mas maging makusog an ginkakaptan nga ebidensya kontra ha mga suspek.

Facebook Comments