General Santos City–Gikumperma ni Police Major Ananiaz Vazquez, ang hepe sa Police Station 2 nga duna na silay lead sa pagsuway ug lugos ug pagpanunggab ngadto sa 6 anyos nga batang babaye sa Barangay Labangal, Gensan niadtong nakalabayng semana.
Matud sa opisyal nga sa karon ila pang gipahugtan ang ilang imbistigasyon ug pagpangalap ug ebidensya aron nga matumbok ang suspek.
Kahinumduman nga pakyas ang suspek nga malugusan ang biktima apan iyang gidunggab 13 ka higayon ang menor de edad.
Dugang pagbutyag ni Police Major Vasquez nga sa karon dili pa nila masulti kung kaila sa pamilya sa biktima ang suspek sa pagpanunggab.
Apan base sa ilang inisyal nga imbistigasyon migula nga gawas-sulod sa lugar ang suspek.
Samtang gibutyag ni Vasquez nga magdepende sa medical record sa biktima ang kaso nga ilang ipasang-at batok sa suspetsado.
Gikumperma usab sa amahan sa 6 anyos nga biktima nga si Alias Dodong nga luwas na sa makuyaw nga kahimtang ang iyang anak.
Amindo ang amahan nga sa karon wala pa hingpit nga nakarekober ang anak gumikan sa kadaghang samad nga iyang naangkon dihang siya gidunggab sa suspetsado.
Apan mapasalamaton gihapon kini tungod nalampasan na sa iyang anak ang kritikal nga sitwasyon luyo paman sa kadaghang samad nga iyang naangkon.
