General Santos City—Nagpadayon pa ang gihimong imbistigasyon sa Police Station 4 kalabutan sa pagpamusil patay kang police Master Sergeant Emmanuel Coronado, Chief Intel sa Police Station 4, kansa una nang gipusil patay niadtong Byernes sa gabie.
Sumala pa ni Police Col. Aden Lagradante , City PNP Director sa General Santos City Police Office nga gihatagan na niini ug direktiba ang hepe sa Police Station 4 nga tutukan ang maong kaso aron nga gilayon sila nga makapasaka ug kaso sa mga suspect nga mihimo sa maong krimen.
Dugang pa niini nga sa kasamtangan aduna na silay mga person of interest nga gina sundan ug usa sa mga motibo nga ilahang gina tan-aw mao ang may kabahin sa trabaho ni Coronado isip intel officer.
Wala hinuon gionabaliwala sa kapulisan ang uban pang anggulo nga posibleng motibo sa krimen.
Giangkon usab ni Lagradante nga dako gayud nga kawad-on sa ilahang han-ay ang kamatayon ni Coronado hilabi na nga usa kini ka maayong police ug daghan na usab ug accomplishment.
Samtang dili man usab malikayan nga maapektohan ang kinatibuk-ang han-ay sa GSCPO sa nahitabo sa ilahang kaubanan apan gipasalig ni Col. Lagradante nga ang kapulisan ang padayon sa paghimo sa ilang tahas aron nga mabantayan ang kahapsay ug kalinaw sa syudad.(Dave)
