General Santos City—Nahimong nagmalinawon ang unang adlaw sa pagpatuman sa Oplan Tokhang sa pagpanguna sa Philippine National Police (PNP) dinhi sa General Santos.
Kahibaluan nga gisuyod na sa mga tokhangers, brgy opisyal og myembro sa MEDIA ang matag Barangay aron awhagon ang mga drug listed personalities nga musurender na.
Apan gikumperma sa mga kapulisan nga sa dihang pag abot nila sa mga lugar kung asa nagpuyo ang mga gituohang anaa sa drug watch list ang wala na sa ilahang mga panimalay o gipuy-an.
Kampanti karon si Gensan City OIC City PNP Director Sr Supt Ruel Berango nga ginasunod sa iyahang mga kapulisan ang bag-ong operational guidelines alang sa Oplan Tokhang.
Samtang sa pamahayag usab ni Police Chief Inspector Aldrin Gonzales, ang tigpamaba sa Police Regional Office 12 nga ang mga “tokhangers” ang gilangkuban sa mga taga PDEA, LGU, Barangay Anti-Drug Abuse Council, ingon man mga religious organization, NGO og uban pang mga law enforcement agencies.
Dugang pa ni Gonzales nga sa Region 12, kapin sa 300 ka mga drug listed personalities ang nakatakdang paga bisitahon sa Oplan Tokhang team aron awhagon usab nga musurender na lamang. (Emir Bariquit)
