General Santos City–Hugot nga siguridad ang gipatuman sa kapulisan sa Prisinto 8, sa dakbayan sa Gensan kagahapong adlawa atul sa unanag adlaw sa distribusyon sa singko mil ka pesos nga financial support ilawom sa Special Amelioration Program sa DSWD.
Kahibaluan nga lima ka mga barangay sa Gensan ang unang nakadawat sa maong subsidiya nga gilangkuban sa Brgy Tinagacan, Upper Labay, Batomelong, Siguel og Brgy South.
Sa lima ka mga barangay tulo niini ang anaa sulod sa AOR sa prisinto 8 nga mao ang Tinagacan, Upper Labay og Batomelong. Sumala ni P/Capt. Bashir Alindo- hepe sa station 8, ila gihapong gipatuman ang mga balaud kalabutan sa ECQ.
Pamahayag ni Capt. Alindo nga ubay-ubay ang mga tawo nga midagsa sa mga lugar ghain gipang-apud-apod ang hinabang hinungdan nga anaa ilang presensya aron nga sigurohong matuman ang social distancing.
Gipaniguro usab sa opisyal nga tanang mga tawo nga mugawas sa ilang balay aron mo-claim sa maong benepisyo nakasul-ob og facemask subay sa mando sa gobyerno.
Pahimangno ni Alindo nga pwedeng arestuhon ang kinsa mang makasupak apan sa ilang kabahin ginahatagan usa nila og usa ka higayon ang nakalapas.(Jordan Britos)
