General Santos City–Nanghinangno ang hepe sa Police Station 2 nga si Police Chief Inspector Jeng Salarda ngadto sa mga negusyante nga mag amping kanunay batok sa mga nagkatag na usab karon nga peke nga kwarta.
Kahinumduman nga sa nakalabayng adlaw, usa ka fastfood chain o baligyaanan ug litsong manok ang mireklamo sa buhatan sa Police Station 2 human nga napalitan kini ug usa ka litsong manok gamit ang P1,000.00 nga peke nga kwarta.
Sumala ni PCI Salarda nga dapat matud pa sutaon pag-ayo sa mga negusyante o mga crew ang ginadawat nga kwarta sa ilang customer kung kini ba peke o dili aron nga dili mabiktima niining mga mapahimuslanong tawo ug mga mangingilad sa ilang isig kaingon.
Dugang pa ni Salarda nga dapat usab panid-an pag ayo sa mga negusyante ang ilang mga customer kung magdali-dali gani sa pagkuha sa ilang mga sukli, dapat sila magduda na tungod basin ug peke nga kwarta na ang gibayad ngadto kanila.
