Full blast operation ang gipasalig sa hepe sa Regional Operations Planning Division sa Police Regional Office kun PRO-7 subay sa pagpadayon na sa PNP sa Oplan Tokhang niini batok sa ilegal nga drugas .
Matod ni Sr/Supt.Julian Entoma, hepe sa Regional Operations Planning Division sa PRO-7 nga ang ilang operasyon motumbok sa mga giila nga drug personalities basi sa listahan nga gisubmiter gikan sa nagkadaiyang Barangay Anti-Drug Abuse Council kun BADAC .
Nipahibawo sab si Entoma nga ang Tokhang team dili magdala og drug enforcement unit dili sama kaniadto ug lahi kini karon diin dili na mamahimong bayolente ang ilang mga operasyon nga nagpasabot nga kon modagan ang ilang subject, ila nalang kining pasagdan ug i-refer nalang sa drug enforcement unit .
Nidugang sab si Entoma nga dili tugotan ang mga sakop sa Tokhang team nga mga pulis nga mosulod sa mga panimay nga ilang bisitahon sa ilang subject aron malikayan ang mga espekulasyon gikan sa publiko.
Gipahimangnoan sa maong opisyal ang tanang sakop sa Tokhang team sa Central Visayas nga gidili sila sa pagpugos sa mga gidudahang drug personalities sa pagsurender sa kapulisan .
