Subay sa plano sa gobiyerno nga himoong legal ang paggamit sa marijuana alang sa medical purpose lamang, nipadayag og kabalaka ang Cebu City Police Office kun CCPO partikular na sa guidelines nga nalatid sa maong sugyot nga posibleng mamahimo nang balaod.
Namahayag si CCPO Chief Joel Doria nga pipila sa mga balaod sa nasud gipang-abuso lang apan kung alang sa kapulisan kung dunay makalapas sa balaod, angay kining atubangon sa akusado ug silotan.
Dugang ni Doria nga kinahanglan nilang susihon ang mga legal prescriptions tungod kay mao kini ang mamahimong basehanan sa pagpalit og marijuana kung ma-legalize na kini sa nasud.
Wa’ sab matago sa maong police official ang laing gikabalak-an niini nga dunay pipila ka mga indibidwal nga tugotan sa paggamit og marijuana posibleng motago og supply niini ug mahimong ilegal lang gihapon mo-apod-apod sa uban nga nagumon niini.
Nipaneguro sab si Doria nga wa’ sila’y natala nga mga plantasyon sa marijuana sa dakbayan sa sugbo, ug sagad sa mga madakpan nga malambigit sa marijuana sa milabay’ng katuigan naggikan gawas sa syudad .
Samtang usa ka medical officer sa Department of Health sa Central Visayas nga si Dr. Dino Caing supak sab sa maong sugyot sa kagamhanan tungod sa iyang pagtuo nga dunay dakong purohan nga kini ma-abusahan.
