ILOILO – Gintuyo nga i-abduct sang apat ka mga persona sakay sa van ang 19 anyos nga dalaga kagab-i.
Base sa pahayag sang tiya sang biktima, halin sa eskwelahan ang iya hinablos sang nanaog ini sa jeep sa stoplight sa Ungka, Jaro agud kuntani magpasaugat sa iya amay.
Apang, nakibot na gid lang iya hinablos sang hinali lang may nagdulog nga isa ka-van nga nagaduag grey kag ginpwersa ini pasakay sa salakyan.
Natigayon pa nga madala sang mga suspek ang babaye apang sang ara na sa area sang greenmeadows sa circumferential road nabuksan niya ang pwertahan sang van kag maswerte nga nakapanginluwas.
Sa panaysayon sang babaye, lima ang sakay sang van nga ginalakipan sang isa ka-babayi kag apat ka lalaki kag lunsay mga alog ukon tagalog speaking ang mga suspek.
Matapos ang insidente nagpablotter ang dalaga sa Jaro Police Station upod sa iya amay kag tiyo.
Ginmandu naman ni ICPO Director Henry Biñas ang insigida nga pagpa-alerto sa tanan nga police stations kag ang paghiwat sang checkpoints.
Natandaan sang dalaga ang plate number nga ZPG-195 gani gina-imbestigahan na ini karun sang Regional Intelligence Division ang record sang salakyan.
