General Santos City–Gihatagan lamang ug 70 nga grado ni Kagawad Jeng Gacal ang kinatibuk-ang performance sa kapulisan sa ilang trabaho kini gumikan sa daghang nabiktima sa pagpamusil patay sa riding in tandem criminals sa syudad niadtong nakalbay’ng tuig.
Sumala pa sa konsehal nga wala pa gihapoy mga nadakpang responsable sa pagpatay gani nagtuo kini nga duna gihapoy galihukan nga gun for hire sa Gensan.
Saysay pa sa opisyal nga una nang giangkon kaniadto sa kanhing city director sa syudad nga si Police Col. Raul Supiter nga duna gayuy gun for hire nga galihukan sa Gensan hinungdan nga dili maundang ang pagpamusil patay sa dakbayan.
Pamahayag man usab ni Kagawad Gacal nga usa sa nakita niini nga problema ang minus gayud nga intelligence network sa kapulisan hinungdan nga dili gayud madakpan ang mga riding in tandem criminals.
Tungod kay nakulangan pa ang maong kagawad sa performance sa kapulisan sa ilang trabaho gihatagan na lamang niini ug 70 nga grado.
Nanghinaot na lamang ang konsehal nga mahatagan ug kasulbaran ang nagakahitabong patay sa syudad ug madakpan ang mga suspek aron maangkon ang hustisya sa mga pamilya sa biktima. (Reynald Timario)
