General Santos City–Andam na ang kapulisan sa Sarangani Province sa paghatag og seguridad sa mga katawhan sa kasaulugan sa All Saints’ Day og All Souls’ Day.
Segun ni Police Superintendent Rodolfo Inoy Jr., ang deputy provincial director for operation sa Sarangani Provincial Police Office kon SPPO, sugdan nila karong adlawa ang pag-deploy og dungag personahe nga mubantay sa mga vital installation sa tibuok Sarangani. Gani pahugtan pa ang mga checkpoints nga ginapatuman sa mga municipal police station og sa provincial mobile force company. May mga kawani pud sa EOD kon Explosive Ordnance Disposal ang maglibot tibuok probinsya. Naka-alalay usab ang mga community volunteers, sama sa IBDF kon Integrated Barangay Defense and Development Force og mga radio communication group.
Aduna matud pay dise-syete (17) kabuok dagkong mga sam-ang sa Sarangani ang pagabantayan sa mga kapulisan, upat (4) sa Malungon, upat (4) usab sa Maasim, tulo (3) sa Malapatan, tulo (3) gihapon sa Alabel, og tag-usa (1) sa Glan, Kiamba og Maitum.
Hugot nga ginadili ang pagdalag mga mahait nga butang og hinagiban sulod sa mga sementeryo, bawal ang mga ilimnong makahubog og pagpatukar og kusog nga mga music og videoke.
Makanunayon ang hugot nga pagsuporta ngadto sa PNP sa mga katawhan og sa mga local officials sa pagpanguna ni Governor Steve Chiongbian Solon og ang pito (7) ka mga mayor, maong nagpabilin matud pa nga hapsay ang tibuok Sarangani Province.
