Ang kapulisan kagahapong adlawa sa Dipolog City uban sa Zamboanga del norte police office sa pagpanguna ni PSSupt. Raul M. Tacaca ug sakop sa armadong kusog sa pilipinas naka alerto samtang nagpaabot sa paghidangat ni VP Leni Robredo sa atong dakbayan.
Ang tumong sa maong pag deploy sa mga tinugyanan sa balaod mao ang paghatag seguridad sa Bise Presidente.
Pasado alas 11:00 sa udto kagahapon nahidangat si VP Robredo uban sa iyang mga sakop sa OVP sa pagpanguna ni Ehla Rongalerios.
Usa sa mga rason sa pag anhi ni VP Leni mao ang pagbisita sa lungsod sa Siayan para mag turn over sa Dormitoryo nga hinatag sa Yellow Boat of Hope Foundation ug sa OVP alang sa mga estudyante nga nanimuyo sa lagyong lugar ug nagtungha sa pampublikong tulunghaan sa lungsod sa Siayan.
Human nga nahinabi si VP Leni niining inyong tigbalita may kalabot sa iyang pagbisita dinhi sa atong probinsya, mi dretso kini sa lungsod sa Siayan, didto nagpahigayon usab ug mga security measure ang kapulisan uban sa taga Bureau of fire Protection sa maong lungsod.
Malipayon usab siya nga gisugat sa katawhan sa lungsod sa Siayan sa pagpanguna sa Inahan sa maong lungsod nga si Mayor Flora Villarosa, mga magtutudlo ug mga estudyante.
Mi tunol usab ang OVP ug mga tool para sa Senior High nga sarang magamit sa mga magtutungha.
Ang pagbisita ni VP Lenis a Lungsod sa Siayan mao kadto ang ikaduha ka higayon.
*Samtang s*a laing bahin, walay mga dinagkong panghitabo nga natala sa kapulisan sa matag lungsod sa ning atong probinsya sa Zamboanga del norte gawas lang sa mga petty crimes nga natala apan dili angay kabalaka-an kay dili kini makapatandog sa kahapsay ug kalinaw.
Hinuon kanunay nga nagpahinumdom ang kapulisan nga magbinantayon sa gihapon matag karon ug unya kung adunay Makita nga kadudahang mga tawo dali nga I taho sa buhatan sa kapulisan aron gilayong mahatagan ug aksyon.
