General Santos City–Padayon pang ginasuta karon sa Police Station 3 kung posible ba nga usa lang ka grupo ang milungkab sa duha ka mga sakyanan sa area sa Police Station 3 niadtong milabay nga gabie kung asa dakong kantidad sa kwarta ug duna pay gamit ang nakawat sa mga suspect.
Sumala pa ni Police Major Peter Pinalgan Jr. ang hepe sa Police Station 3 nga basi sa ilang imbistigasyon, pipila lang ka oras ang akalabay human nga gilungkab ang usa ka sakyanan, laing pagpanglungkab nga gikalambigitan sa basag kotse ang natigayon sa ngit-ngit ug mingaw nga lugar nga sakop sa Police Station 3.
Dungan niini giklaro ni Major Pinalgan nga kanunay nga naga pahigayon ug pagpatrolya ang ilang tropa apan ang kapulisan ray gibantayan sa mga suspek ayha nila himuon ang ilang plano nga paglungkab sa mga sakyanan.
Gikumperma hinuon ni Major Pinalgan nga aduna na silay person of interest sa maong mga insidenti, kini subay na usab sa ilang nakuha nga kopya sa CCTV footage nga kuha sa lugar.
Nag dumili hinuon si Pinalgan nga ibutyag ang dugang detalye tungod nagpadayon pa ang ilang imbistigasyon. Pahimangno ni pinalgan sa mga nanag-iya ug sakyanan nga kung muadto sa usa ka patigayon dapat didto ipark ang ilang mga sakyanan batang sa CCTV o dili ba kaha sa mga lugar nga hayag aron nga mag duha-duha ang kawatan nga kini biktimahon.
Kahinumduman nga sunod sunod nga nabiktima sa basag kotse silang Linavelle Verbal Uy hain nakuhaan ug P14,000 ug mga importanteng dukomento ug ang usa ka Sofia Ocada Haw, 22 anyos nga nakuhaan usab ug cellphone. (Dave Silagan)
