Davao City – Gisuta ug gisubay karon sa lokal nga panggamhanan ang gikatahong karne nga nakasulod sa syudad sa Davao gikan sa Davao del Sur.
Ang maong rebelasyon gibutyag mismo ni Davao City Mayor Sara Duterte-Carpio atol sa media briefing dungan sa pag-awhag sa kooperasyon sa tanan pinaagi sa paghatag og impormasyon sa City Veterinarian’s Office aron kini gilayong maaksyonan.
Segun sa alkalde, adunay diyutay’ng posibilidad nga miagi sa shortcut ang mga makasulod nga truck gikan sa Lacson paingon sa Mandug hinungdang nag-montar na sila karon og checkpoint sa maong dalan.
Sa pikas bahin, maglusad og inspeksyon ang City Vet sa gikatahong report nga adunay lain pang barangay sa Calinan District nga nag-positibo sa African Swine Fever (ASF).
Dugang sa hepe-ehekutibo nga magpahigayon og confirmatory test ang maong buhatan ug ipatuman ang saktong protocol panahon nga mag positibo ang ilang findings.
Kahinumduman nga gipailawom sa State of Calamity ang Barangay Lamanan ug Domingga sa Calinan District usab gigahinan kini og P20-M livelihood assistance pinaagi sa ‘farm gate price’ diin matag kilo sa buhing baboy paliton kini sa kantidad nga P1,599.00 matag baktin.
Saysay usab sa mayor nga walay ayudang gitunol ngadto sa mga meat vendors.
Dugang sa alkalde nga lauman ang pagsaka sa presyo sa basic commodities sa merkadohan gumikan sa hulga sa ASF.
RadyoMaN Jason Amisola
