General Santos City— Luwas nga kaunon ang mga karneng manok sa Gensan ug bisan na sa mga silingang mga lugar. Kini ang gipaniguro ni Dr. Washington Loreno, action officer sa City Health Gensan. Pamahayag ni Dr. Loreno nga sa karon wala pa silay unsa mang naitalang mga lugar nga apektado sa bird flu sa tibuok dakbayan.
Samtang padayon ang ginahimong pagmonitor sa City Health Office Gensan sa kaso sa bird flu. Sumala ni Dr. Loreno, nga nakig-alayon na sila sa Department of Health 12 aron sa pagkuha ug mga datus ingon man impormasyon kabahin sa bird flu nga nahimong outbreak sa pipila ka mga lugar sa Luzon.
Dugang pa niya sa kasamatangan, wala pa silay naitala nga transmission sa virus gikan sa mga manok nga apektado sa bird flu ngadto na sa mga tawo, apan kini ang talagsaon ra matud pa nga kaso.
Paniguro niini nga ang DOH 12 ug ang City Health GenSan, uban ang lain pang mga ahensya sa gobyerno ang naghimo na ug lakang aron dili maapektuhan ug dili makaabot sa ilahang area of responsibility ang bird flu nga nahimo ng problema sa Luzon.
Giawhag usab niini ang mga kunsyumante nga mahimong mabinantayon sa pagpili ug mga karne ug labaw sa tanan lutuon ug sakto ang karne nga kaunon. (Lore Mae Romualdo)
