Davao City- Daw napino-pino ang kasingkasing sa usa ka seaman gumikan sa sobra kasakit nga gibati niini human nangita og batan-on ang iyang asawa.
Matud ni alyas Joeffer,34 anyos, seaman ug nanimuyo sa Mintal, ang pagpangabit sa iyang asawa nga si alyas Daisy sama ra nga gitagudtagud ang iyang kasingkasing gumikan sa grabe kasakit nga iyang gibati.
Gisaysay pa ni Joeffer nga una na kini nagduda nga basin dunay laing lalake ang iyang gimahal nga kapikas.
Mao nga alas 8:00 kagabii, nakahukom kini nga sundan niya ang iyang asawa hangtud sa Dona Pilar Village Sasa ning dakbayan.
Misangko sa usa ka boarding house ang iyang asawa ug nagpaabot sa batan-on nga giilis kaniya.
Human sa pila ka minutong nakalabay, migawas sa boarding house ang lalake ug dayon lambing kaayo nga gisugat sa iyang asawa.
Human nasaksihan sa bana nga sweet ang duha, dinhi na nakadisider si Joeffer nga kumprontahon ang asawa.
Giingong wala na makalimod pa ang misis ug napugos kini og angkon nga nagkahigugmaay sila sa batan-on nga si Dove Jones Verano, 19 anyos.
Sanglit nagminahal kuno ang duha, nakahukom si Daisy nga hingpit na bulagan ang seaman aron mahatagan na og kagawasan ang paghigugmaay ni Daisy ug ni Dove Jones.
Sa dihang nabati sa bana ang pamulong sa asawa didto na kuno nagsugod ang paghugno sa iyang kalibutan nga gitinubdan sa tanan niyang pag-antos ug paghago sa pagtrabaho sa barko miluib ug nahanaw na kaniya.
Walay laing nahimo ang bana gawas sa pagpatala sa Sasa PNP aron matambagan siya sa angay niyang himoon batok sa maluibon niyang asawa uban ni Dove Jones
RadyoMan Joel Viray
