Mikunhod karon ang kaso sa Dengue sa Misamis Oriental base sa talaan sa Provincial Health Office.
Sa bulan sa Enero hangtud Mayo sa miaging tuig, mikabat sa 1,312 ang kaso sa dengue apan mikunhod kini sa 574 ka kaso sa samang panahon ning tuiga.
Matud ni Aldo C. Obenza sa Provincial Health Office-Misamis Oriental, kumpyansa ang ilang buhatan nga mokunhod pa ang ihap niini sa mosunod nga mga adlaw isip resulta sa hugot nga kampanya kontra dengue sa ilang buhatan.
Pareho sa COVID-19, gitawag usab nga “killer virus” ang dengue kung asa target niini ang nag-edad 12 paubos nga naa sa 60 percent hangtud 70 percent kung mapasagdan.
Ning panahon sa ting-ulan, hangyo ni Obenza sa katawhan nga padayong magmabinantayon ug aktibo sa pagpanglimpyo sa palibot sama sa pagyabo sa mga sudlanan nga walay taklob nga posibleng puy-an sa lamok nga nagdala sa dengue aron dili na sila modaghan.
Angay usab nga sundon ang “4S” o search and destroy, self-protection, seek early consultation, ug say “yes” to fogging.
