General Santos City–Gikumperma ni Overseas Worker Welfare Administration -12 Regional Director Marlyn Jamero nga gitabangan na sa gobyerno ang OFW nga si Juvelyn Gomez nga taga Klinan 6, Polomolok kansa biktima sa pagmaltrato sa iyang amo sa nasud Kuwait.
Gikumperma usab niini nga anaa gihapon sa kustudiya sa POLO nga nakabase sa Kuwait ang nasangpit nga OFW. Human ilang nadawat ang impormasyon bahin sa gidangatan ni Juvelyn ngadto sa maong nasud, punay na ang ilang pakig-alayon sa POLO aron nga masiguro nga okey ang sitwasyon sa nahisgutang OFW.
Dugang pagbutyag ni Director Marlyn Jamero nga sa nakalabayng adlaw gibisitahan sa iyang mag staff ang panimalay sa ugangan ni Juvelyn sa may Klinan 6. Didto nakakuha sila ug dugang pang impormasyon bahin sa pagpanarbaho sa nasangpit nga OFW ngadto sa Kuwait.
Dependi na matud pa kang Juvelyn kung mupasang-at kini ug kaso batok sa iyang amo nga mikulata ngadto kaniya. Kung mufile kini ug kaso, posibling dili pa kini makauli sa Pilipinas tungod kinahanglan pa niini ang personal appearance nagdto sa korte. Apan kung makig-areglo ang nahisgutan posibling makauli na gilayon kini dinhi sa nasud.
