Tulo ka mga punto isip depensa ang gipasibaw sa Sangguniang Panlungsod ning syudad sa Butuan sa ilang “counter affidavit” nga gipasa sa Office of the Ombudsman base sa kasong graft nga gipasaka sa periodista’ng si Salvador “Buds” Cupin batok kanila subay sa kontrobersyal nga proyekto’ng Polysports Complex sa brgy. Tiniwisan ning dakbayan sa Butuan. Sa interview sa RMN DXBC Butuan gipasabot ni City Councilor Atty. John Gil Unay, ang tulo ka mga punto isip depensa sa ilang kampo. Sa isyu nga wala naggahin ug pundo ang Konseho alang sa maintenance sa naasyong proyekto, gibutyag ni Konsehal Unay nga mag-agad lamang ang Sanggunian sa budget request gikan sa buhatan sa Mayor.
Ikaduhang punto nga iyang gipasibaw, dili makagahin ug pundo usab ang Sangguniang Panlungsod alang sa Polysports complex tungod kay wala pa kini ma-turn over sa contractor.
Ikatulong punto mao ang order sa Commission on Audit (COA) nga nagdili sa LGU nga mogahin ug pundo alang sa proyekto tungod kay nagpadayon pa ang gihimung audit investigation. Dugang pa ni Konsehal Unay nga kung adunay angay pasakaan ug kaso ni Cupin, kana mao ang nakalabay’ng administrasyon nga maoy nagtukod sa kontrobersyal nga proyekto.
Subay niini, adunay pipila ka mga Konsehal ang matud pa mopasaka ug kaso ni Cupin gumikan kay nagpagamit lamang kini sa usa ka pilderong pulitiko.
Sent from my Samsung Galaxy smartphone.
