Yara na sa 16 ang narekord nga kaso sang napositibo sa coronavirus ukon COVID-19 sa South Cotabato sa diin 4 dire ang returning OFW kag walo naman ang locally stranded individual base sa datos sang Integrated Provincial Health Office kahapon sang aga.
Sa nasambit nga numero 6 na suno pa ang nakarekober kag ang 10 ang padayon nga nagapaidalom sa 14 days quarantine.
Apang ginpaklaro ni Provincial Health Officer Dr. Rogelio Aturdido Jr., nga wala nila ginlakip sa datos ang kaso sa Tampakan tungod indi man siya dire sa probinsya ginpaidalom sa RT –PCR test kag nakabalik na sa lugar sa diin siya nakadestino.
May-angot sini, suno kay Dr. Aturdido wala sang dapat kabalak-an ang mga pumuluyo dire sa probinsya angot sa nasambit nga kaso sa Tampakan.
Ginpahayag niya nga nahibaluan lang nila ini sang namangkot ang mga taga Regional Epidemiology and Surveillance Unit ukon RESU Region XI sa Provincial Epidemiology and Surveillance unit kon nakapauli dire sa probinsya ang nasambit nga pasyenti.
Ginkumpirmar man ni Dr. Aturdido nga ang nagpositibo sa COVID-19 ang miyembro sang Special Action Force o SAF sang PNP kag ginpasugtan lang ini nga makapauli sa banwa sang Tampakan tungod negatibo ang resulta sang rapid test sa ginhalinan nga lugar , apang bag-o nagpauli ginkuhaan ini sang swab sample kag ginpadala sa Southern Philippines Medical Center sa Davao city sa diin nakumpirma nga positibo nga posible nalatnan sang COVID-19 ang nasambit nga polis sa lugar sa diin siya nadestino.
