Nagsaka ang kaso sang COVID-19 dire sa syudad sang Koronadal sa diin base sa datos yara sa 45 ang aktibo nga kaso.
May-angot sini, ginpahayag ni Koronadal City Health Officer Dr. Editho Vego dapat ikaalarma ang kaso sang COVID-19 dire sa syudad tungod yara sa gihapon ang paandam sang nasambit nga balatian ilabi na nga may bag-o nga variant nga ginabantayan dire sa rehiyon.
Padayon naman nga ginaawhag ni Dr. Vego ang tanan nga ugalion na ang paggamit sang facemask/faceshield kon maggwa kag permanente nga maghugas sang kamot tungod sa subong nga panahon indi na mahibaluan kon sin-o ang may COVID-19.
Samtang kon may-yara sang nabatyagan nga sintomas sang COVID-19 ginaawhag niya ang katawhan nga maghambal gid agud nga maimbestigaran kag indi na makalaton pa.
Subong nga adlaw suno kay Dr. Vego magapadayon ang COVID-19 vaccination sa mga frontliners dire sa syudad sang Koronadal nga ginalakipan sang BHW, medtech,dentist pharmacist, contact tracers kag iban pa gamit ang Sinovac vaccine.
