Naglab-ot na sa 2,766 ang kaso sang balatian nga dengue sa probinsya sang South Cotabato kag 16 ang narekord nga patay base sa datos sang Provincial Epidemiology Surveillance Unit sang Provincial Health Office halin Enero tubtob Hunyo 29 subong nga tuig.
Ang nasambit nga kaso ang mataas sang 128.4 percent kumparar sang nagligad nga tuig sa kapareho nga period.
Narekord naman ang numero sang napatay sa nasambit nga balatian sa banwa sang Surallah may tatlo, tig duha naman sa mga banwa sang T`boli, Sto. Niño, Polomolok,Banga kag Koronadal City, tig-isa naman ang patay sa mga banwa sang Norala, Tampakan kag Tupi.
Nagagwa man sa datos nga sa 16 nga patay 11 dire ang nagapang-edaron sang 21 tubtob 73 anyos.
Nagapanguna naman sa may mataas nga kaso sang balatian nga dengue ang syudad sang Koronadal nga may 507 , nagasunod ang banwa sang Surallah nga may 342, Tantangan may 336, Banga -291,Tupi may 260 ka kaso, Polomolok may 249 ka kaso, Norala may 239 , Tampakan -163, T`boli -159, Sto. Niño -141 kag Lake Sebu may 79 ka kaso.
May-angot sini, suno kay Dr. Aturdido nagpatawag ang iya nga pamunuan upod ang DILG sang pagsinapol upod na ang mga Association of Barangay Captains sa South Cotabato, Municipal Health Officer kag Sanitary Inspectors kon ano ang gilayon aksyon nga himuon nga maaddress ang pagsaka sang kaso sang balatian nga dengue.
Suno kay Dr. Aturdido kinahanglan nga maghulag ang komunidad para maprebentar ang nasambit nga balatian paagi sa paglimpyo sa palibot.
