Ginalauman na sang Department of Health Region 6 nga magataas ang kaso sang Dengue subong nga tuig.
Ini ang ginpahayag ni Dr. Jessie Glenn Alonsabe, Regional Epidemiologist sang DOH 6 matapos nagtaas ang kaso sang Dengue sa bilog nga rehiyon 6.
Suno kay Alonsabe nga humalin sang 2016 nga mataas man ang kaso sang Dengue, nagnubo naman ini sang 2017 kag 2018 kabangdanan gina-antisipar na nila nga magasaka naman ini subong nga tuig.
Subong man, ginpahayag ni Alonsabe nga madasig ang pagsaka sang nasambit nga balatian subong nga tuig kon sa diin temprano pa nga nagtaas ang kaso sini ikumparar sang mga nagligad nga tuig.
Base sa record sang DOH, masobra na sa 10,000 ka kaso sang dengue sa rehiyon humalin sang Enero 1, tubtub Hunyo 15 subong nga tuig kon sa diin 61 ang patay.
Masobra 200% suno kay Alonsabe ang pagtaas sini ikumparar sang 2018 nga may masobra 3,000 lamang ka kaso kag 28 ang patay.
