Alarming na sa subong ukon yara na sa hotspot ang South Cotabato sa balatian nga tipdas tungod sa gulpi nga pagdamo sini suno kay Provincial Health Officer Dr. Rogelio Aturdido Jr.
Sa subong nagalab-ot na sa 53 ang kaso sang nasambit nga balatian kag isa ang napatay, base sa ulihi nga datos nga ginpaggwa sang Provincial Epidemiology Surveillance Unit halin Enero 1 tubtob Pebrero 14 subong nga tuig.
Ang nasambit nga kaso ang mataas sang 43.2% kumparar sang nagligad nga tuig sa kapareho nga period.
Base sa datos nagapanguna sa may madamo nga kaso ang Polomolok nga may 34 kag may isa ka 4-anyos nga napatay, ginasundan sang Koronadal City may lima, Norala may apat, Banga may 3 ka kaso, tig-duha naman ang kaso sang tipdas sa mga banwa sang Surallah, Tampakan kag Tupi kag isa naman sa banwa sang Lake Sebu.
May-angot sini, suno kay Dr. Rogelio Aturdido Jr. Provincial Health Officer sang South Cotabato posible madeklarar ang measles outbreak kon indi suno pa makontrol ang amo nga balatian.Apang ang makadeklarar lamang suno pa sang outbreak amo ang Department of Health.
Ginkumpirmar man ni Dr. Aturdido nga 41 ukon 77 porsyento sang kaso ang wala nabakunahan kontra tipdas.
