General Santos City—Nahagbong sa areglo ang natigayong pagpanunggab patay sa manghod ngadto na sa iyang magulang nga natigayon sa Maasim, Sarangani province, alas 8:00 sa buntag niadtong nakalabayng simana.
Biktima giilang si Lloy Ramirez 35, nga taga Sitio Coronado, Barangay Malalag, Malungon , Sarangani Province. Samtang ang suspek giilang si Rey Ramirez, 31 anyos, residenti sa samang lugar.
Sumala ni Police Major Romeo Calamba, Hepe sa Maasim PNP nga mitambong sa birthday party sa may Barangay Amsipit, Maasim Sarangani Province ang duruha, apan dihang nahubog ang biktima didto niini gibunalan ang iyang manghod.
Posibleng napuno na ang suspek sa ginahimo kaniya sa iyang magulang mao nga mikuha kini ug kutsilyo dayon gidunggab ang biktima nga hinungdan sa kamatayon niini.
Dugang pagbutyag ni Police major Calamba nga wala na mipasang-at ug kaso ang asawa sa biktima ngadto sa iyang bayaw tungod bisan siya nga asawa, ginakulata usab sa suspek hilabi na kung mahubog.
Samtang migula sa imbistigasyon sa kapulisan nga bisan ang ilang inahan ginakulata sab sa biktimang si Lloyd mao nga natigum ang kasuko sa manghod nga misangko gyud sa pagpatay.
Nasayran nga gibuhian na sa Maasim PNP ang suspek nag si Rey niadtong nakalabayng adlaw human nga wala na magpasang-at ug kaso ang pamilya sa biktima.
