General Santos City—Gi-andam na sa Police Station 6 ang kasong pagsupak sa Presidential Decree 1602 kon Illegal Gambling batok sa unom ka mga personahe nga silang Remidios Ochea, 39 anyos, Judith Dinoy, 43 anyos, Julito Doria, 20 anyos, Mary Grace Batulan, 40 anyos, Jocelyn Abay-Abay, 32 anyos ug Bienvenida Mahilum, 60 anyos, nga pulos nanimuyo sa Zone 9, Barangay Bula ning syudad human nga masikop nga nagdula ug tong-its alas 3:30 ang takna sa hapon sa susamang lugar.
Sumala pa ni Police Lieutenant Omar Baret ang Deputy Chief Of Police sa Police Station 6 nga sa karon giandam na nila ang mga dukumento sa pagpasang-at ug kaso batok sa mga dinakpan.
Samtang nakig-alayon na ang PNP sa buhatan sa Barangay Bula ug CSWD aron masayran kung aduna bay atubangong laing kaso ang mga nahisgutan human nga upat sa mga dinakpan ang gigamit matud pa sa sugal ang kwarta gikan sa social amelioration program sa goberno.
Dismayado usab si Baret sa upat ka dinakpang benepisyaryo sa SAP tungod kay gigasto lang nila sa sugal ang ilang nadawat nga ayuda nga para unta sa pagkaon sa ilang pamilya labi na karon nga nag-atubang ang nasud sa krisis sa Covid-19.
Tungod niini subling gipahimangnuan ni Baret ang katawhan ilawom sa ilang AOR nga gamiton ug sakto ang kwarta nga gikan sa gobyerno ug dili gamiton sa walay pulos nga butang sama sa sugal ug sa iligal nga droga. (CDS)
