Davao City – Subling gipanghambog ni Barangay 76-A Kapitan Bogart Trajera nga andam sa kanunay ang iyang katawhan sa bisan unsang klase nga katalagman nga muigo dinhi sa siyudad sa Davao.
Matud ni Kapitan Trajera, walay hunong ang ilang pagbansay sa mga residente mahitungod sa lahi-lahi nga kalamidad sama sa linog ug tsunami ug regular nila kini ginapahigayon sa ilang barangay.
Kamatooran niini mao ang paghimo nila og Purok Disaster Action Team nga maoy mi-edukar sa mga tawo ug magsilbi sab nga responder panahon sa emerhensiya segun ni Kapitan Trajera.
Giingon pa niini nga sa natad sa pagdeterminar sa lahi-lahi nga tingog sa emergency siren, hanas ang katawhan sa maong barangay tungod walay sipyat ginatudlo kini ngadto sa mga residente.
Dugang ni Kapitan Trajera, nasayod na sab ang iyang katawhan sa mga evacuation centers nga ilang adtoan ugali muhampak ang linog, tsunami, bagyo, ug uban pang kalamidad dinhi sa dakbayan.
Apan gitino sa Kapitan nga wala pa gyod ingon nga naperpekto sa iyang katawhan ang mga drills sama sa ‘duck, cover, and hold’ nga pambatok sa peligro nga dala sa linog ug uban pang katalagman.
Ang Barangay 76-A gikunsidarang pinakadako nga populasyon sa tibuok siyudad nga dunay kinatibuk-ang 100,000 ka residente ug 30,000 niini nagpuyo sa shoreline.
Gisulti sa mga disaster expert nga ang tsunami posibleng muabot sa shoreline sa siyudad labing pinaka dugay lima hangtud napulo ka minutos lang ug ang unang lampornas ang mga nagpuyo sa kabaybayunan.
Musalir kaha ang gipanghambog ni Kapitan Trajera? Dili ba kaha hinoon magbaha og mga patay ang iyang barangay hatud unya sa linog, tsunami, ug uban pang kalamidad?
Mao kana ang ato sutaon pag-abot sa tukmang panahon.
RadyoMaN Joel Viray
