Davao City – Dakung pahat sa katawhan sa habagatan dakung pabor sa nagkakusog nga panawagan nga tapuson na sa hingpit ang walay klarong peacetalks tali sa gobyerno ug sa hut-ong sa CPP-NPA-NDFP.
Sa buntagong flagship carrier program sa RMN DXDC Davao nga ‘Straight to the Point,’ kasagaran sa mga nahinabi sa atong sibyahanan dismasyado sa kapakyas sa rebeldeng pundok nga magpakita sa ilang determinasyon ug kamatinud-anon sa pagkab-ot sa saktong formula alang sa gitawag nga ‘lasting peace’ sa nasud.
Nag-unang katarongan sa mga kritiko sa dispalinghadong peace process mao ang kakulang sa sinseridad sa bando sa NPA ug mga kaalyados niini nga undangon ang ilang mga opensiba batuk sa mga operatiba sa gobyerno ug bisan na sa mga pribadong korporasyon ug sa mga extortion activities gitawag nila nga ‘revolutionary tax collections.’
Sa pikas bahin, hugot usab gi-kwestion karon ni National Security Adviser Hermogenes Esperon ang kakulang sa ‘enabling environment’ ingon man ‘reciprocal moves’ sa bahin sa mga rebelde haron unta moganar na ang mas kritikal ug mas malisud nga porsyon sa peace process diin sulayan pagdiskute ang mga nag-unang suliran sa nasud.
Gibatbat ni Esperon ang NPA Maasin Iloilo attack, ang Quirino Province incident diin nagtahum ug mga improvised explosive device kun IEDs ang mga rebelde, ang latest incident sa Gumaca, ang pagdabdab sa mga makinaryas sa Dole Stanfilco sa Surigao del Sur ug ang PSG convoy attack sa tri-boundary sa Davao, Bukidnon ug North Cotabato.
Usab giluwatan na ni Pres. Rodrigo Duterte ang marching order nga isunod na paglutos human sa Maute group sa Marawi mao ang mga rebeldeng grupo sa entero nasud.
Dinhi sa Davao, nilutaw usab karon ang dakung posibilidad nga tun-an ug konsiderahon sa City Government of Davao ubos kang Mayor Inday Sara Duterte ang pagpahigayun sa ‘localized peacetalks’ sa tumong nga masustinihan ang mga nahimo na insiyal diha sa natad sa peace-building kun pagpatunhay sa atong kalinaw.
Kasamang June Duterte
tags: Mindanao, Davao City, DXDC, DXDC 621, June Duterte, Straight to the Point, Peacetalks, National Security Adviser Hermogenes Esperon, Mayor Inday Sara Duterte
