BACOLOD CITY – (Update) Natigayon na gid man nga ma take over ni Mrs. Cathy Cabuga, ukon mas kilala bilang MTRCB Board Ms. Kate Brios ang pagdumalahan sang Metro Inn Hotel halin sa kamot sang iya bana nga si Francis Cabuga.
Suno sa abogado ni Cathy nga si Atty. Jomax Ortiz, kagab-i ginsulod nila ang hotel pinaagi sa pag-guba na gid lamang sang pwertahan sa likod nga bahin sang Metro Inn.
Madumduman nga sadtong Lunes sang gab-i, November 19, gintake-over ni Francis ang amo nga hotel upod ang iya abogada nga si Atty. Erfe del Castillo kag walo ka mga security guards.
Ginrason ni Mr. Cabuga sa pagsulod kag pag-trangka sa hotel amo nga ipaidalum ini sa audit kag inventory rason nga may nagluntad nga tensyon matapos ini ginpalibutan sang mga pulis kag ginpasira ang bilog nga 6th Street.
Ginpahayag ni Atty. Jomax nga kaina antis las 8 sanday Francis Cabuga na lamang kag ang iya abogada, Atty. Del Castillo ang nabilin sa 2nd floor sang hotel matapos nga nagpanaug na ang ila mga kaupdanan kagab-i. Apang pasado las nueve nagpanaog na gid lamang ini sila.
Pahayag ni Ortiz nga back to normal naman ang operasyon sang hotel kon diin na-accommodate na nila liwat ang ila mga guest.
Nahibaluan nga gin-ako damlag pa ni Cathy nga nagtunga-ay na sila sang properties sang iya bana.
Sa pihak nga bahin, ginbuyagyag ni Atty. Jomax nga dungan gali nga gin take over ni Francis ang Metro Inn kag isa pa gid nila ka property nga amo nga Villa Iska sa Pta. Taytay.
Ginapanindugan sang kampo ni Mrs. Cabuga nga preparado man sila sa pagtake-over sa Villa Iska kaangay sang ginhimo nila sa Metro Inn./dyHB BACOLOD
