Ang mga opisyales sa Badian, Cebu andam mosakripisyo og usa ka semana nga halin gikan sa Kawasan Falls ug uban pang mga canyoneering adventures para sa general cleanup sa maong lugar.
Sulod sa pito ka adlaw, gikan sa Agosto 12-18, isirado sa lokal nga kagamhanan ang Kawasan ug temporaryong i-suspende ang mga canyoneering activities.
Dili lang kay ang Kawasan Falls area ang isirado kon dili apil na ang lugar padulong sa Matutinao River, (lugar kung asa sikat ang canyoneering ug trekking.)
Giklaro ni Badian tourism officer Donald Villarin nga ang mga jump sites ra nga gipanag-iya sa Badian ang ilang i-sirado sa usa ka semana.
Matud ni Villarin nga ang pagsirado sa Kawasan Falls gi-aprobahan na sa tanang mga stakeholders, apil na ang mga tour guides ug operators.
Dugang ni Villarin nga nakadesidir sila sa pagsirado sa maong lugar tungod kay ang buwan sa Agosto gikonsidera isip usa ka lean month ug ang mga turista kasagaran mobisita sa buwan sa Abril.
Pahimangno ni Villarin nga usbon ang schedule sa mga turista sa ilang pagbakasyon kon nagplano silang mobisita sa Badian ecotourism sites sa ikatulong semana sa buwan sa Agosto.
