Davao City- Inay kalipay ang dala sa pag-uli gikan sa pagka-kampeon sa usa ka street dancing, kasubo, kalagot, ug kaguol ang gibati karon sa mga estudyante ug pamilya nila sa natigayong pagpangambush sa Brgy. Kimlawis, Kiblawan, Davao del Sur kagabii diin duha na ang patay samtang pito ang samaran.
Giila ang mga namatay nga sila Nibert Malanson ug Jimboy Linkanay, 16 anyos samtang padayon pa nagpaayo ang pito ka mga samaran lakip na ang drayber sa truck sa balay tambalanan.
Nasayran nga pauli na unta ang mga biktima gikan sa usa ka gi-apilang street dancing sa Damsu Festival sa Kiblawan apan sa ilang pag uli, lahi ilang gidangatan.
Sa padayong imbestigasyon sa kapulisan, wala pa gihapon mailhi ang mga suspek kinsa mi-ambush sa usa ka dump truck nga gisakyan sa kapin 40 ka mga estudyante sa Kimlawis National HighSchool, Kiblawan.
Sa interview sa DXDC RMN Davao kang Kiblawan PNP Acting Police Chief Police Senior Inspector Erich Von C. Requilman, padayon gihapon ang ilang imbestigasyon subay sa natigayong insidente apan gituuhang mga grupong bandido o miyemero sa tribong B’laan ang mi-ambush sa mga estudyante.
Pahimangno ni Requilman ngadto sa katawhan ilabi na sa mga residente sa Kiblawan nga padayong mag-igmat ug gilayong i-report sa kapulisan ug kasundalahan kung duna may mamatikdang kadudahang lihok.
RadyoMaN Renz Barbarona
