Davao City – Human supaka ni Adan ug Eba ang kamanduan sa Ginoo nga dili kaonon ang prutas sa maayo ug dautan, ang sala nisulod sa kalibutan ug niguba sa maanindot nga plano sa Dios ug milaglag sa tawo nagdto sa kaala-otan.
Matud ni Bishop Ariel Coleto, founder sa Brethren Evangelical School of Theology, ang kamatayon-pisikal dili angay kahadlokan apan ang kamatayon nga espiritwal angay kahadlokan sanglit walay kahumanan nga kasakitan ang matilawan niadtong tawong nagpalingog-lingog lamang sa pagdawat sa gugma ug kaluwasan nga gitanyag sa Dios pinaagi sa iyang bugtong anak.
Mabasa diha sa Genesis 3 ang pamulong sa Diyos nga ang kamatayon sa lawas ug espiritwal niabot sa tawo gumikan sa sala ni Adan ug Eba nga napanunod sa kapin pito ka bilyon ka tawo sa kalibutan karon.
Ang Hebrews 9:27 nagpamatuod nga ang tawo gitagana na nga mamatay sa pisikal ug tungod niini, walay ni usa kanato molungtad sa kalibutan bisan og unsa pa kini ka dato o ka gamhanan.
Dili lamang sa aspetong pisikal mamatay ang tawo apan mamatay usab siya sa espiritwal didto sa impyerno nga giandam sa Diyos diin itambog ang mga tawong walay pagtoo sa Ginoo.
Sumala sa Romans 6:23, ang bayad sa sala mao ang kamatayon sa impiyerno diin ang Bibliya naghulagway sa impyerno nga kahadlokan ug ikaduhang kamatayon sa mga makasasala.
Ang kasulatan nagbutyag nga didto sa impyerno magpunay og singgit ang mga tawo gumikan sa walay makatandi ug nanghingapin nga kainit diin ang mga ngipon magpangagot ug niana, panganduyon sa tawo nga mamatay apan butang kini nga ihikaw kaniya.
Ang pag-ampo sa mga patay dili makaluwas ug makalikay gikan sa silot sa kamatayon didto sa linaw sa kalayo sa mga tawong tig-a ang kasingkasing diha sa pagpangayo og pasaylo sa mga kasal-anan sa ilang kinabuhi.
Busa angayan lamang pasalamatan ang Diyos tungod kay luyo sa kabug-at sa sala sa tawo, wala pa gyod hingpit gitugyan sa kalaglagan ang tawo didto sa impyerno inay gitagaan pa kita sa higayon sa pagbag-o.
Hagit kanatong tanan nga dili ibale-wala ang pagpangayo og pasaylo ug pagdawat kang Hesu Kristo isip personal nato nga Diyos ug Manluluwas pinaagi sa pagtoo ngadto Kaniya samtang dili pa ulahi ang tanan.
Kay ang mga tawo nga walay Kristo sa kinabuhi segurado nga ang pultahan sa linaw sa kalayo nagpaabot kanila ug sakiton sila’g maayo sa mga antos hangtud sa kahangturan.
Gidasig usab karon ni Coleto ang tanan nga wala pa’y Kristo nga dili usikan ang gihatag nga panahon aron dili muabot ang pagmahay sa pagpakanaog na unya sa hukom sa Diyos.
Walay tawo ning kalibutana nangandoy nga mupaingon ngadto sa kadautan apan ang Bibliya nagsaysay nga didto paingon ang mga wala mudawat kang Kristo pinaagi sa hingpit nga pagtoo.
Katapusang pahinumdom ni Coleto nga ang kamatayon-pisikal kadaugan sa adunay Diyos sa ilang kinabuhi apan kapildihan sa walay Kristo ug sila dili makalikay sa paghukom ug kapungot sa Ginoo pag-abot unya sa tukmang panahon.
RadyoMaN Joel Viray
