Kinawat nga motor, ginbaligya han suspek ha Facebook, tag-iya an nakapalit

3130

TACLOBAN CITY – Iginbaligya han suspek ha Facebook an motor nga iya ginkawat ha Brgy. 97 Cabalawan, Tacloban City dida han December 4.

Ginkilala an suspek nga hi Archie Gay, 18 anyos usa nga estudyante, residente han Brgy. 99 Diit, Tacloban City.


Ginkilala naman an biktima nga hi Rey Tarcela, aada na ha sakto nga pangidaron, residente han Brgy. 97 ha Cabalawan.

Nagawas ha imbistigasyon han mga otoridad nga matapos kawaton han suspek nga hi Archie an XRM black nga motor, iginpost ini ha Facebook group nga “Leyte buy & sell” ngan iginkakabaligya ha kantidad nga P20,000.

Pag abri han Facebook han biktima nga hi Tarcela, amu dayon an iya nakit-an kun diin nakaplastar an iya motor ha Facebook.

Iya ginmessage an suspek nga hiya an mapalit han motor ngan didto na nagka-deal an biktima.

Antis magkita an duha, nangaro hin bulig hi Tarcela ha mga kapulisan.




Nagkita kakulop, December 8 an suspek ngan an biktima ha Brgy. 77 Fatima Village kun diin didto na nagdumara hin entrapment operation an mga kapulisan.

Nadakop an suspek ngan kakasuhan hin anti-carnapping law.

Ginpangunahan an operasyon ni P/Major Daniel Polo.

Facebook Comments