Davao City – Mituo ang usa sa mga nanag-iya og internet cafe nga nakaapekto gayud sa iyang kita ang pagpatim-aw sa Davao Bunal Squad sa dakbayan.
Sa interbyu sa DXDC RMN Davao kang Analie Migreño, nanag-iya og internetan sa Mintal relocation ning syudad nga katunga ang gi-ubos sa iyang kita sa internetan human sa insidente sa pagpanglatus sa giinong bunal squad o latigo group.
“Number one pud to nga rason kay wala nay nagalaag nga batan-on kay mangahadlok sila. Niubos gyud karon kay kadtong niagi mura’g dako-dako’g income. Pero karon nigamay gyud siya, katunga,” saysay ni Analie.
Dugang ni Analie nga wala may insidente sa pagpanglatigo sa ilang lugar apan na-obserbahan niini ang riot sa mga batan-on sa ilang area bag-ohay lamang.
Kahinumduman nga nag-viral sa social media ang litrato sa mga biktima sa pagpanglatigo sa mga wala mailhing grupo sa mga kalalakin-an.
RadyoMaN Kirby Manzon
