Klase sa public schools suspendido karon sa hapon

79

ILOILO City – Wala klase sa syudad sang Iloilo subong nga hapon Enero 12, 2013.

Ini base sa ginpaggwa nga Executive Order No. 07 S. 2018 nga ginpaggwa ni Mayor Jose Espinosa III kahapon sang hapon.

May kaangtanan ini sa Opening Salvo sang Iloilo Dinagyang 2018.

Ginrason ni Espinosa ang kabudlay sa pagbyahe sang mga estudyante pakadto sa eskwelahan kag pauli sa ila puluy-an kun ngaa nagdeklarar sya sang kanselasyon sang klase.

Suno sa EO ang staging sang Dinagyang Festival 2018 opening salvo sa Biernes, Enero 12, 2018 magatuga sa pagsarado sang mga dalanon sa syudad kag bangud sini mabudlayan ang mga pupils kag estudyante sa ila pagpakadto sa eskwelahan kag pauli sa ila puluy-an nga kinahanglan nila maglakat sang pila ka kilometro.

Sakop sang mando ang tanan nga level sang public schools diri sa syudad sang Iloilo.

Ginatugyan naman sa discretion sang mga principals kag school administrator sang private schools ang pagdesisyon kun magdeklarar sang suspension sang klase.

Nahibaluan nga may road closure subong sugod ala 1:00 sang hapon tubtob ala 6:00 sang gab-i.

Magaperform ang pulo ka mga tribu sa lima ka mga judging areas nga ginalakipan sang Iloilo Freedom Grandstand, Iloilo Provincial Capitol, Delgado-Mabini, Quezon-Ledesma, kag Ma. Clara kun sa diin may duh aka tribu kada judging area nga magaperform sang dulolongan.

Ang mga tribu amo ang Tribu Paghidaet sang Lapaz National High School; Tribu Panayanon sang Iloilo City National High School; Tribu Pan-ay sang Fort San Pedro National High School; defending champion Tribu Salognon sang Jaro National High School; Tribu Buntatalanit sang Baranga Lanit and Buntatala; Tribu Dagatnon sang Ramon Avancena National High School; Tribu Ilonganon sang Jalandoni Memorial National High School; Tribu Obreros sang Barrio Obrero National High School; Tribu Amihan sang Mandurriao National High School; kag Tribu Tapaznon sang Tapaz, Capiz.

Facebook Comments