Davao City – Suspendido karon ang klase sa giskwelahan sa 4-anyos nga bata nga gikaingong namatay tungod sa gisuspetsahang kaso sa meningococcemia.
Sa eksklusibong inyterbyu sa RMN Davao sa tinubdan sa Leap of Faith Learning Center, gikanayon niini nga wala pay partikular nga adlaw kung kanus-a mubalik ang klase gani magpaabot sa ilang anunsyo.
Sa opisyal nga pamahayag sa maong tulunghaan, gikasubo nila ang kamatayon sa maong estudyante samtang gipaniguro ang kanunay ug hugot nga komunikasyon sa mga ginikanan, guardians, faculty ug mga personahe sa tulunghaan ingon man sa responsableng ahensiya sama sa Department of Health (DOH) ug City Health Office.
Sa pagkakaron, subling gipahimangnoan ang mga pamilya nga dunay studyante nga nagtungha nga magpakonsulta gilayon sa mga healthcare provider gumikan sa medical emergency.
Gidasig usab ang mga ginikanan nga respetohon ang privacy sa namatayang pinaagi sa paglikay og pag-upload og photos diha sa social media aron dili masamutan ang kasubo niini.
Subay niini, nagpadayon sa gihapon ang imbestigasyon sa CHO labot sa suspetsadong kaso sa nasampit nga sakit ug gikatakda nga mapagula ang resulta sa confirmatory tests sa dili madugay.
RadyoMaN Jason Amisola
