Zamboanga del Norte – Gisabotan ug gidesisyonan karon sa mga sakop sa Sangguniang Panlalawigan sa Zamboanga del Norte sa pagpangulo ni Vice-Governor ug Presiding Officer Senen O. Angeles nga magmugna ug usa ka komitiba nga maoy mangita ug kasulbaran sa nahitala nga mga boundary disputes tali na sa mga probinsiya sa Zamboanga del Norte, Zamboanga del Sur, Zamboanga Sibugay ug Zamboanga City.
Kini maoy nasayran human madawat ug mabasa ang sulat gikan ni Regional Director Teresita Socorro C. Ramos sa National Economic and Development Authority (NEDA-IX) kinsa maoy Chairman usab sa Regional Land Use Committee (RLUC) IX atol sa gipahigayon nga regular session niini.
Si Majority Floor Leader Crisologo A. Decierdo ang mipasupot sa resolusyon nga nagmugna sa usa ka komitiba nga maoy sangonan sa pagsubay ug paghimo sa mga lakang aron sa pagsulbad sa boundary disputes/conflicts kon panagbingkil sa mga dulonan sa mga lungsod nga nahisakop sa Zamboanga del Norte nga giangkon usab sa mga probinsiya sa Zamboanga del Sur, Zamboanga Sibugay ug ingon man Zamboanga City.
Nahilakip sa boundary disputes mao ang mga nagsapaw nga pag-angkon (overlapping claims) sa mga lungsod sa Sergio Osmeña, Sr., sa Zamboanga del Norte ug Molave sa Zamboanga del Sur, nagkasungi nga cadastral survey sa mga lungsod sa Sibutad, Katipunan, Siayan, Sergio Osmeña sa ZDN ug ingon man sa mga lungsod sa Josefina, Dumalinao, Tukuran, Payao ug Alicia sa ZDS ug uban pa.
Diha sa gipagawas nga rekomendasyon sa Regional Land Use Committee (RLUC) IX, gihisgutan niini nga gikinahanglan na nga sulbaron sa mga nagsumpaki nga mga lokal nga kagamhanan sa mga probinsiya nga gihisgutan sa unahan ang mga giawayan nga mga dulonan niini aron permanente na nga mapahiluna ug mapahimutang na usab ang tagsa-tagsa nga political, economic ug geographical areas niini.
Gisugyot usab ni Vice-Governor Angeles nga ang pagamugnaon nga komitiba sa sangguniang panlalawigan nga mosubay ug mohusay sa gihisgutan nga boundary conflicts sa madaling panahon magalangkub sa mosunod: Provincial Legal Officer, Provincial Assessor, Provincial Planning and Development Coordinator ug mga sakop sa Committee on Local Government and Development nga gipangulohan ni Presiding Officer Julius C. Napigquit isip Chairman niini. (ept/ksd)
