Roxas City, Capiz- Aminado si City Engineer Rosano Anisco nga wala pa sini natapos ang ginapangayo sang city council nga “concrete drainage plan” sang syudad sang Roxas.
Suno pa diri nga sa adlaw sang Lunes ini posible matapos bangud nga gina-plot pa nila kag gina-update ang daan nga drainage plan sang syudad.
Sa madumdoman, nga una na nga ginduso ni Chairman on Housing City Councilor Trina Marie Almalbis-Ignacio ang pagrepaso sa comprehensive drainage plan sang syudad pag-abot sa mga housing projects.
Suno diri nga tuman ini ka importante agud nga mahibaluan sang city government kun sa diin kag kun anu ang struktura sang nasambitan nga plano agud nga matun-an sang maayo nga indi magresulta sang pagbaha sa syudad kapareho sang nagakatabo sa pila ka mga dalagkuan nga lugar sa Metro Manila.
Ini ang iga-angut naman sa development plan nga igasumiter sang mga land developers. Ginpahayag dugang ni Ignacio nga duha pa gid lamang ka land developers ang nakasumiter sang tagsa nila ka mga development plan sa housing project.
Suno kay Ignacio, madugay na sini nga ginapangayo ang kopya sang comprehensive drainage plan sang syudad halin sa City Engineers Office apang wala sa gihapon ini sang may nahatag nga kongkreto nga plano.
