Iligan City – Gipatin-aw ni City Councilor Rosevi Queenie Belmonte ang iyang rason sa pagbotar ug NO sa pag-purchase ug mini dump trucks ingon man ambulance sa dakbayan sa iligan.
Matud sa konsehal, daw sa dili haum karong panahona ang paghisgot aron makapamalit sa maong mga ekipo tungod sa krisis sa Corona Virus Disease o COVID 19.
Galaum ang katawhan karon nga mahatagan sa gobyerno ug bugas, alcohol, face mask, vitamins ug uban pa.
Gibutyag ni Belmonte nga daghan ang nawad-an ug trabaho gumikan sa COVID 19 nga mas angay unta nga hisgutan ug hatagan ug solusyon sa gobyerno kay sa pag-purchase sa mga mini dump trucks ug ambulance.
Nasayod si Belmonte nga kinahanglanon usab kaayo ang maong mga gamit alang sa problema sa basura apan mas nagkinahanglan ug dakung atensiyon ug tabang ang katawhan sa Iligan karong panahona gumikan sa problema sa COVID 19.(Ghiner L. Cabanday, RMN Iligan)
