RMN Laoag – Mabalin a sumango iti kaso ni Mary Coleen Columbia Cajigal, maysa a konsehal iti Sangguniang Panlungsod iti Siudad ti Batac, kalpasan nga intarayanna ti maysa a COMELEC Checkpoint Operation idiay Barangay Caunayan iti nasao a siudad, rabii ti Biernes, Marso 15.
Basar ti report, bayat a limmabas ni Cajigal iti checkpoint, dagus a pinatarayna ti luganna isu a kinamat isuna dagiti kameng ti PNP ngem madi da naabutan.
Kalpasan iti sumagmamano a gundaway, nagsubli ni Cajigal idiay checkpoint, ditoy a dinillaw isuna dagiti pulis gapu ti haanna a panangrespetar iti linteg ken kasta payen dagiti kameng iti pulisia.
Ti nasao a checkpoint ket indauloan ti grupo dagiti pulis babaen ken ni Police Major Allan Emerson D. Dauz, officer-in-chargeti PNP Batac ken ni COMELEC Officer Josephine V. Balbas.
Malagip a naiget a maipatpatungpal kadagitoy a gundaway ti checkpoint bayat ti campaign period iti lokal ken national. Maisayangkat met ti panagkampanya dagiti kandidato a para local inton Marso 29.
Sumango ti reklamo mainaeg ti panaglabsing ti Art. 151 iti Revised Penal Code ti Konsehal wenno ‘Resistance and disobedience to a person in authority or the agents of such person.’ Agmulta iti saan a sumurok 500 a pisos ken posible a mabalud depende ti mapaneknekan iti korte.
Ni Cajigal ket agpaidasig manen a para konsehal iti maikadua a termino iti siudad ti Batac.
Bernard Ver, RMN News
