Davao City- Gikontra sa 19th City Council ang batching plant nga planong itukod sa may Carlos P. Garcia nga sakop na sa Barangay Panacan ning siyidad.
Majority sa mga konsehal ang nagsupak nga matukoran og batching plant sa national highway kun daplin sa kalsada ang Panacan area.
Nasayran nga giaprobahan ug gi-endosar mismo sa Local Zoning Review Committee ang pag-reclassify sa Light Industrial Sub-Zone ngadto na sa Heavy Industrial Sub-Zone sa Panacan aron mapabarog ang batching plant sa DMCI-Project Developers Incorporated.
Gipasabot ni City Planning and Development Office Head Ivan Cortez nga karon dagsa ang konstruksiyon sa dakbayan dakong tabang ang batching plant alang sa paspas nga paghuman sa gitukod nga mga gambalay kung mahimutang lang kini sa duol.
Apan hugot nga gibangga ni 2nd District Councilor Danilo Dayanghirang ang gipamahayag ni Cortez sa katarungan nga residential, commercial, school zone, food chain area ang linya sa Panacan.
Gawas niini, peligro sa mutugpahanay nga mga eroplano ang batching plants sanglit anaa ra sab nahimutang sa duol ang Davao International Airport.
Gumikan ani, napugos og bakwi si Councilor Bonifacio Militar kinsa chairman sa Committee on Housing and Subdivisions Development sa giduso niini nga endorsement resolution alang sa mixed concrete batching plant.
RadyoMan Joel Viray
