Kooperatibang migamit og laing pangalan, maimbestigahan kung mureklamo ang senior citizen nga gidakop sa kapulisan

Davao City – Giklaro sa Davao del Sur Police Provincial Office nga lehitimo ang ilahang pagdakop sa mga senior citizen sa Digos City tungod aduna may warrant of arrest nga gi-issue ang korte ug gibuhat lamang nila ang ilahang trabaho sa pagpangdakop sa tamang paagi.

Kini subay sa balitang giaresto ang usa ka senior citizen nga si Maria Intia, 74 anyos nga taga Digos City tungod sa giingong paglapas sa SSS Law niadtong Lunes, December 4, 2023.

Gani gisaysay sa anak niining si Lomily Intia nga adunay kooperatiba sa ilang lugar o ang Badiang Multi-Purpose Cooperative nga naundang ang pagbayad sa Social Security System (SSS). Ug ang gikatingad-an sa ilahang pamilya, pangalan ni Intia ang nakabutang isip Board of Director sa maong kooperatiba.

Sa interview sa DXDC RMN Davao kang Davao del Sur Police Office Provincial Director Police Colonel Giuseppe Geralde, iyahang gibutyag nga sumala pa sa warrant officer sa kaso, naka-bail na ang pamilya ug aduna nay release order ug mamahimo nang gawasnon ang senior citizen.
Segun ni Geralde nga mamahimong maimbestigahan ang Multi-Purpose Cooperative kung mu-complain si Intia ug diha na mupapel ang kapulisan kung aduna nay reklamong gipasaka.

RadyoMaN Ivy Parido